MPJD shpall thirrje publike për aplikim në programin për diplomaci qytetare

Programi për diplomaci qytetare është një program pilot i Ministrisë së Punëve të Jashtme dhe Diasporës (MPJD), qëllimi i të cilit është t’i ndërlidhë profesionistët nga diaspora duke u ofruar mundësi angazhimi në kuadër të MPJD-së për 6 muaj. Synojmë që ky program të ndihmojë në shkëmbimin e njohurive dhe përvojave, dhe krijimin e dijes specifike rreth Kosovës në fushën e diplomacisë publike, me fokus te diplomacia e diasporës, diplomacia qytetare dhe ajo ekonomike.

Kohëzgjatja e këtij programi është 3 tetor 2022 deri në 31mars 2023.

Programi për diplomaci qytetare ofron:

• Trajnime për lidership që u mundësojnë pjesëmarrësve të ndajnë ekspertizën dhe përvojat e tyre të ndryshme, duke e zgjeruar të kuptuarit e tyre për Kosovën;
• Fitim të përvojës praktike në ofrimin e nismave dhe programeve;
• Mundësi për të kontribuar drejt kthimit të trurit në Kosovë;
• Zhvillim të kompetencave dhe ndërgjegjësim ndërkulturor për ndërtimin e një rrjeti global;
• Kompensim me një shumë monetare e cila do t’i mbulojë shpenzimet bazike të jetesës dhe punës gjatë qëndrimit të pjesëmarrësve në Republikën e Kosovës;
• Biletë kthyese aeroplani për në Republikën e Kosovës;
• Certifikatë për përfundimin me sukses të programit të nënshkruar nga Ministrja e Punëve të Jashtme dhe Diasporës.

Për më shumë detaje rreth procesit të aplikimit, kritereve të pranimit, si dhe për qasje në formën e aplikimit, ju lutem vizitojeni uebfaqen: http://www.cdfellowship.com

Afati i fundit për aplikim është më, 24 gusht 2022, ora 16:00.